Ti Moun Rezistans: testimonials

"Pou mwen rezistans la se yon pi gro mwayen pou nou nan grand rue ke Atis yo yo mete pou sove avni tout jen nan ghetto a. Pou mwen menm atis rezistans, se yon reprezantasyon de dye sou la te, paske mwen pa genyen paran ki ap panse pou mwen depi ane 2004 m'ap travay e mwen jwenn ankourajman Eugene Andre, Leah Gordon,Celeur Louko..... ak anpil lot atis ki konn ap ankouraje m travay paske mwen te toujou ap fe efo nan travay mwen yo. Men depi 2006 m'ap fe efo ak atis rezistans yo e tout moun ki konn ap ankouraje mwen yo m'ap peye lekol mwen paske mwen pa genyen papa ki la pou ede'm a manman'm pa genyen kob se efo l'ap fe li genyen 5 pitit.
Vwala depi le mwen leve e mwen komanse travay Arts nan grand rue ak Eugene mwen toujou manje e ale lekol. Pi gro fyete ke mwen genyen,se le mwen ale nan ekspozisyon epi li sou jounal pou moun ap li e gade bel travay mwen yo sou jounal. E tout ta vle konnen'm paske se yon jen atis,e yo toujou ap mande'm pou travay ak lot timoun nan anvironman... Lundi 30 out la mwen ale Decayette,pou travay ak anpil timoun ki pa rete pre nou men mwen ale pou pataje konesans atistik mwen avek yo.
Tout sa se Ti parol pa'm nan jan mwen viv mouvman atis rezistans lan..... Mesi ak tout moun kite banm ankouraj man pou 'm pa dekouraje......"

Alex Louis



"Bon pou mwen menm, rezistans lan reprezante yon gwo bagay pou mwen sa ki fe mwen di sa, gen kek jou mwen leve, neg leve yo pa gen espwa. Epi se konsa blan yo vini nan musee Andre Eugene lan. Epi yo renmen kelke travay pou mwen, epi yo achete nan men mwen. epi ak kob sa mwen regle anpil bagay avek lide tet mwen ak avni mwen. Se konsa mwen pap janm pa sispann remesye Andre Eugene sa ki fe mwen di sa se gras a li ki fe jodi a mwen menm menm. Mwen an rezistans e mwen pap janm dekouraje travay paske gen yon jou mwen espere mwen ap reyisi mesi"

Love Leonce



"pou mwen rezistans lan se yon gwo aktivite pou mwen paske lekol konn pa ka peye yon blan vini mwen vann yon tablo"

Mackendy



"bon mouvman rezistans lan reprezante yon gwo bagay pou mwen nan vi mwen sa ki fè mwen di sa. se paske gen de fwa mwen rete mwen pa gen espwa epi yon blan vini nan musee atis Eugene epi mwen vann yon tablo epi sa se tout mon byen pou nou pataje antre nou mwen santi mwen fyè lè mwen ale yon kote pou tout moun ap di mwen se rezistans mwen ye enswit mwen pap janm pa remesye Andre eugene Epi manajèz mwen Geraldine se gras ak yo ki fè kounye nou konsa se ak tout lot moun kap sipote mwen yo"

Wender



"Pou mwen mouvman rezistans lan se yon bagay enpotan, si tou pou jen kap leve anndan ghetto yo paske mwen we ke si'm pa't ladann m'te ka yon gro bandi pou sosyete a. E se ladann tou mwen fe ti kob mwen pou'm regle tout sa ki enpotan pou mwen e pou fanmi'm le'm vann yon tablo sa se youn nan gro enpotans pou mwen se pou sa mwen renmen mouvman sa e mwen te vle pou nou plis ankadreman pou nou omwen te fe yon expozisyon a le tranje..... Mesi"

Londel



"Bon rezistans lan reprezante yon gwo bagay pou mwen paske menm lè mwen poko anyen nan atis la mwen panse yon jou tankou lot atis yo, paske rezistans lan fè anpil bagay pou mwen, gen de lè mwen rete mwen pa gen espwa se konsa touris vini nan musee Andre Eugene lan epi yo achete kelke pyès nan men mwen lè konsa se yon gran plezi pou mwen ak kob sa a mwen pap janm pa remesye Andre Eugene ak manajèz mwen Gertaldine se gras ak yo ki fè mwen ye jounen jodi a – mesi"

Evens Richelieu aka Ti Boss Art



"bonswa tout moun pou mwen rezistans reprezante yon gwo bagay nan vi'm an premye lye paske gen de jou mwen leve manman'm pa gen kob e anpils papa'm pa gen kob se gras ak Eugene ki ka fè mwen gen yon kob paske se li ki fè blan yo vini vizite atelye san rival la. Aprè sa toujou li fè blan yo arive achte youn ou plizyè tablo menm lè se pa nan menm li achte tablo a men se nan men yon lot atis tankou Wender, Love, Alex li arive achte tablo a. Sa toujou fè'm plezi paske nou tout se frè nou ye nan atelye a nou toujou pataje tout sa nou genyen ansanm e tout sa ki arive fèt se gras ak bondye e avèk Andre Eugene mesi"

Milord aka SoSo



"ti moun rezistans reprezante,yon gran bagay pou mwen nan vi'm paske mwen gen dwa chita la a yon enspirasyon vini nan tet mw en epi tou, mwen pran flap, plim, mwen trase desen epi mwen koumanse travay, e lem finn travay anpil moun dil bè epi etranje yon konn achte epi yo felisitem pou travay mwen sa ki konn banm anpil ankourajman ak fos, e chak moman sa yo mwen santim fyè de tèt mwen epi mwen santi lavi a ki ap dim toujou reziste pa dekou raje egal mouvman rezistans lan reprezante tankou yon metye, yon lot fanmi ak yon bagay mwen te reve poum te fè se pou sa m'ap ankouraje tout moun ki nan art pou yo pa dekouraje....mèsi"

Camsuze Mondesir



"Mouvman timoun rezistans lan reprezante yon pakèt bagay pou mwen, dizon tankou lè'm m'ap travay, mwen mete tout nanm mwen ladann, tout lanmou'm ladan yo. Bon se tankou mwen konn di se yon lot vi, se yon lot enspirasyon paske lè'm m'ap fè arts nan timoun rezistans mwen rive kominike anpil bagay, ex: lapè, lajwa, lanmou e tout sa mwen santi, kom yon fi...
pou'm fini m'ap voye yon gwo kout chapo pou manmanm ki toujou soutni'm nan tout sa m'ap fè, spesyalman Andre Eugene ki se papi cheri'm e ki toujou ap banm konsèy epi ki ap pouse'm vè lavan, e ki banm anpil ide sou sa m'ap fè yo...mwen remèsye tout zanmi papa'm yo tou, tankou: Celeur Jean Herard, Ronald Bazil aka Cheby, e m'ap voye yon gwo remèsiman pou Leah Gordon tou ki toujou ap ankouraje nou..."

Saradia Eugene



"Mouvman rezistan lan reprezante,anpil pou mwen, paske lè'm pat ko ladann, mwen te konn pase jounnen'm san mwen pap fè anyen e sa te konn fè'm pèdi anpil tan nan ranse bay blag, pa ale lekol epi pèdi enpil bon bagay nan lavi'm, men dè ke mwen vinn nan rezistans nan fen novembre 2009, mwen te koumans eprans espwa e gras ak art, Andre Eugene, Timoun Rezistans epi Ghetto Biennale 09, mwen te rive jwenn yon vrè rezon pou'm viv, travay pou'm ka rive yon gwo bagay nan lavi mwen, anfèt Rezistans ede'm di sa ke mwen santi, tristès,l apenn, stress, solititid, imalyasyon ke mwen konn jwenn ak yon mwayen ki senp ke yo rele art, epi Rezistans tou fèm rive ede lot moun pa mwayen tele ghetto, vrèman Atis Rezistans/Timoun Rezistans/Tele Ghetto...se tankou yon nouvo fanmi pou mwen epi se yon espas kote mwen ka kominike talan mwen ak inspirasyon mwen."
"L'Art est un autre moyen de communiquer."

Romel



"Mwen te kontan anpil e mwen pa p janm sispann kotan pou pwogram Ghetto Biennale ki te fet an Ayiti a,mwen te kontan anpil paske te gen anpil lot atis ki soti nan yon paket bann lot peyi ki te vinn patisipe avek nou, sa mwen te pi renmen yo te pataje esperyans yo avek nou e nou te pataje esperyans nou avek yo ,egzanp Ebony Patterson ki te fe yon bel espozisyon ,te gen Carole tou avek jonas ki te travy ansanm e yo te fe bel rad ,Ghetto biennale la se te youn nan pi bel moman nan vi mwen ,se sak fe mwen ta renmen yon lot Biennale fet nan Ayiti anko e mwen ta vle ke li gen plis siksè, pou gen plis atis ke premye a,avek plis moun ki pou vinn achte pou yo ka ankouraje art's nan mond lan."

Racines Polycarp